పవన్ ఆరోగ్యంపై వాకబు చేయని పిఠాపురం నేతలు.. నాగబాబు ఫైర్!

ఏపీ డిప్యూటీ సీఎం, జనసేన అధినేత పవన్ కల్యాణ్ ఆరోగ్యం గురించి ఏ ఒక్కరూ ప్రస్తావించకపోవడంపై ఆయన సోదరుడు, ఎమ్మెల్సీ కొణిదెల నాగబాబు తీవ్ర ఆగ్రహం వ్యక్తం చేశారు. పిఠాపురంలో పార్టీ నాయకులతో నిర్వహించిన సమావేశంలో ఈ ఘటన చోటుచేసుకుంది. పవన్ కల్యాణ్ ఆరోగ్యం గురించి ఆరా తీయకుండా, స్థానిక సమస్యలు, ఇతర డిమాండ్లపై మాత్రమే నేతలు మాట్లాడటంతో నాగబాబు అసహనానికి గురయ్యారు.

శస్త్రచికిత్స అనంతరం విశ్రాంతి తీసుకుంటున్న పవన్ కల్యాణ్ ఆరోగ్య పరిస్థితిపై అప్డేట్ ఇచ్చేందుకు నాగబాబు గురువారం పిఠాపురంలో జనసేన ముఖ్య నాయకులతో సమావేశమయ్యారు. ఈ సందర్భంగా ఆయన మాట్లాడుతూ, పవన్ ఆరోగ్యం ప్రస్తుతం నిలకడగా ఉందని, మరో వారం రోజుల్లో ఆయన తిరిగి తన విధుల్లో చేరే అవకాశం ఉందని తెలిపారు. అయితే, ఈ సమావేశంలో నేతలు తమ సమస్యలనే ఏకరువు పెట్టడం మొదలుపెట్టారు. ఫైవ్ మ్యాన్ కమిటీ పనితీరు, కాపు కార్పొరేషన్ ఏర్పాటు వంటి అంశాలను ప్రస్తావించారు.

దీంతో కల్పించుకున్న నాగబాబు, స్థానిక నేతల తీరుపై తీవ్రస్థాయిలో మండిపడ్డారు. "నేను ఇక్కడికి వచ్చింది వివాదాలు మాట్లాడటానికి కాదు. పవన్ కల్యాణ్ ఆరోగ్యం ఎలా ఉందని మీలో ఒక్కరైనా అడిగారా? ఈ నియోజకవర్గం కోసం ఆయన ఇంత కష్టపడుతుంటే, ఆయన పరిస్థితి గురించి తెలుసుకోవాలనే ఆలోచన కూడా మీకు లేదా? మీకు అసలు కొంచమైనా సెన్స్ ఉందా?" అంటూ తీవ్ర స్వరంతో ప్రశ్నించారు. నాగబాబు ఆగ్రహంతో అక్కడున్న నాయకులు ఒక్కసారిగా నిశ్శబ్దమైపోయారు. అనంతరం తమ తప్పు తెలుసుకుని నాగబాబుకు క్షమాపణలు చెప్పారు. 

ఈ సమావేశంలో పిఠాపురం అభివృద్ధి గురించి మాట్లాడుతూ.. గత రెండేళ్లలో నియోజకవర్గంలో సుమారు రూ.600 కోట్లు ఖర్చు చేసినట్లు నాగబాబు తెలిపారు. ఎన్నికల హామీలను దశలవారీగా నెరవేరుస్తామని భరోసా ఇచ్చారు. అయితే, రామ్ గోపాల్ వర్మ వివాదంపై స్పందించేందుకు ఆయన నిరాకరించారు. వైద్యుల సలహా మేరకు పవన్ కల్యాణ్ మరో వారం, పది రోజులు పూర్తి విశ్రాంతి తీసుకుని, త్వరలోనే అధికారిక కార్యక్రమాల్లో పాల్గొంటారని పార్టీ వర్గాలు వెల్లడించాయి.